Manchester United hefur lengi verið í hópi bestu knattspyrnuliða heims og árangur þess, sérstaklega þegar Sir Alex Ferguson var knattspyrnustjóri þess, er með hreinum ólíkindum. Frá árinu 1992, þegar enska úrvalsdeildin (Premier League) var stofnuð, hefur liðið 12 sinnum orðið Englandsmeistari og liðið hefur hampað enska meistaratitlinum alls 20 sinnum.

Á afrekaskrá Manchester United ber líklega hæst keppnistímabilið 1998 - 1999 þegar liðið vann þrjá titla, leikmenn þess urðu Englandsmeistarar, bikarmeistarar og unnu Evrópukeppni meistaraliða eftir magnaðan úrslitaleik við Bayern Munich.

Eftir keppnistímabilið 2012 - 2013 lét Sir Alex Ferguson af störfum sem knattspyrnustjóri Manchester United eftir langan og ótrúlega sigursælan feril. Undir stjórn Sir Alex vann félagið alls 38 titla, þar af þrettán Englandsmeistaratitla auk þess sem liðið varð í tvígang Evrópumeistari.

Keppnistímabilið 2013 - 2014

David Moyes tók við stjórn Manchester United þann 1. júlí 2013 en hann var rekinn úr starfi þann 22. apríl 2014, eftir að hafa starfað í aðeins tæpt ár af sex ára samningi hans við félagið. Þá voru fjórir leikir eftir af keppnistímabilinu og Ryan Giggs stjórnaði liðinu til loka þess. Þann 19. maí 2014 tók Louis van Gaal við sem knattspyrnustjóri Manchester United og Ryan Giggs var ráðinn aðstoðarmaður hans.

Af leikmannamálum Manchester United fyrir keppnistímabilið 2013 - 2014 og meðan á því stóð, er helst frá því að segja að frá liðinu fóru þeir Paul Scholes (hætti knattspyrnuiðkun), Ryan Giggs (hætti knattspyrnuiðkun), Jesse Lingard (lánaður til Birmingaham City og síðar Brighton and Hove Albion), Anderson Luís de Abreu Oliveira - Anderon (lánaður til Fiorentina) og Wilfried Zaha (lánaður til Cardiff City). Alls voru 13 leikmenn liðsins leystir undan samningi eða seldir frá liðinu.

Það er óhætt að segja að illa hafi gengið að fá leikmenn til Manchester United fyrir keppnistímabilið og m.a. reyndi liðið, án árangurs, að fá þá Leighton Baines, Cesc Fàbregas, Ander Herrera, Fábio Coentrão og Sami Khedira. Niðurstaðan var sú að til liðsins komu þeir Guillermo Varela (keyptur frá Peñarol), Marouane Fellaini (keyptur frá Everton), Saidy Janko (keyptur frá Zürich) og Juan Mata (keyptur frá Chelsea).

Manchester United byrjaði keppnistímabilið á því að vinna Samfélagsskjöldinn með því að leggja Wigan Athletic að velli, 2:0. Liðið endaði í sjöunda sæti ensku úrvalsdeildarinnar, féll úr leik fyrir Swansea City í þriðju umferð ensku bikarkeppninnar, féll úr leik fyrir Sunderland í undanúrslitum deildabikarkeppninnar og féll úr leik fyrir Bayern Munich í fjórðungsúrslitum Evrópukeppni meistaraliða. Markahæstur var Wayne Rooney en hann skoraði 19 mörk í öllum keppnum.

Keppnistímabilið 2014 - 2015

Fjölmargir leikmenn fóru frá Manchester United fyrir keppnistímabilið og meðan á því stóð. Má þar nefna þá Rio Ferdinand (samningslaus), Federico Macheda (frjáls för til Cardiff City), Nemanja Vidić (frjáls för til Inter Milan), Patrice Evra (seldur til Juventus), Shinji Kagawa (seldur til Borussia Dortmund), Danny Welbeck (seldur til Arsenal), Darren Fletcher (frjáls för til West Bromwich Albion), Wilfried Zaha (seldur til Crystal Palace), Anderson Luís de Abreu Oliveira - Anderson (frjáls för til Internacional í Brasilíu), Nani (lánaður til Sporting), Javier Hernández (lánaður til Real Madrid) og Jesse Lingard (lánaður til Derby County).

Af þeim leikmönnum sem komu til Manchester United ber helst að geta þeirra Ander Herrera (keyptur frá Athletic Bilbao), Luke Shaw (keyptur frá Southampton), Marcos Rojo (keyptur frá Sporting), Ángel Di María (keyptur frá Real Madrid á 60 milljónir punda), Daley Blind (keyptur frá Ajax) og Radamel Falcao (fenginn að láni frá Monaco).

Manchester United endaði í fjórða sæti ensku úrvalsdeildarinnar, féll úr leik fyrir Arsenal í sjöttu umferð ensku bikarkeppninnar og féll úr leik fyrir Milton Keynes Dons (0:4) í annarri umferð deildabikarkeppninnar. Í fyrsta sinn, síðan keppnistímabilið 1989 - 1990, tók liðið ekki þátt í neinni Evrópukeppni og í fyrsta sinn, síðan keppnistímabilið 2004 - 2005, vann liðið ekki til neinna verðlauna. Wayne Rooney var markahæstur leikmanna með 14 mörk skoruð í öllum keppnum.

Keppnistímabilið 2015 - 2016

Talsverðar breytingar urðu á leikmannahópi Manchester United fyrir keppnistímabilið 2015 - 2016 og þess ber helst að geta að frá liðinu fóru þeir Anders Lindegaard (frjáls för til West Bromwich Albion), Javier Hernandez (seldur til Bayer Leverkusen), Adnan Januzaj (lánaður til Borussia Dortmund - kom til baka í janúar), Jonny Evans (seldur til West Bromwich Albion), Radamel Falcao (skilað aftur til Monaco), Nani (seldur til Fenerbahçe), Ángelo Henríquez (seldur til Dinamo Zagreb), Tom Cleverley (leystur undan samningi, fór til Everton), Rafael Da Silva (seldur til Lyon), Ángel Di María (seldur til Paris Saint-Germain) og síðast en ekki síst, Robin van Persie (seldur til Fenerbahçe).

Til liðsins komu þeir Anthony Martial (keyptur frá Monaco), Sergio Romero (frjáls för frá Sampdoria), Memphis Depay (keyptur frá PSV Eindhoven), Matteo Darmian (keyptur frá Torino), Morgan Schneiderlin (keyptur frá Southampton) og Bastian Schweinsteiger (keyptur frá Bayern Munich).

Manchester United endaði í fimmta sæti ensku úrvalsdeildarinnar, liðið varð enskur bikarmeistari í 12. sinn eftir 2:1 sigur á Crystal Palace en liðið féll úr leik fyrir Middlesbrough í fjórðu umferð deildabikarkeppninnar. Í meistaradeild Evrópu endaði liðið í þriðja sæti í riðlakeppninni, féll þar með úr leik og fór í útsláttarkeppni Evrópudeildarinnar. Þar féll liðið úr leik eftir tap gegn Liverpool í 16 liða úrslitum.

Markahæstur leikmanna á keppnistímabilinu var Anthony Martial en hann skoraði 17 mörk í öllum keppnum.

Keppnistímabilið 2016 - 2017

Þann 24. maí 2016 var Louis van Gaal sagt upp störfum enda árangur liðsins, undir hans stjórn, talsvert undir væntingum. Þann 27. maí 2016 var José Mourinho ráðinn knattspyrnustjóri Manchester United og þann 2. júlí 2016 tilkynnti Ryan Giggs að hann væri farinn frá Manchester United, eftir að hafa verið hjá liðinu síðan 1987.

Helstu breytingar á leikmannahópi Manchester Untited, fyrir keppnistímabilið 2016 - 2017, voru þær að frá liðinu fóru þeir Victor Valdes (frjáls för til Middlesbrough), Adnan Januzaj (lánaður til Sunderland), Guillermo Varela (lánaður til Eintracht Frankfurt), Cameron Borthwick-Jackson (lánaður til Wolves), James Wilson (lánaður til Derby County) og Paddy McNair (seldur til Sunderland).

Til liðsins komu þeir Zlatan Ibrahimović (frjáls för frá Paris Saint-Germain), Eric Bailly (keyptur frá Villarreal), Henrikh Mkhitaryan (keyptur frá Borussia Dortmund) og Paul Pogba (keyptur frá Juventus).

Í janúar 2017 urðu þær breytingar á leikmannahópi Manchester United að frá liðinu fóru þeir Sam Johnstone (lánaður til Aston Villa), Morgan Schneiderlin (seldur til Everton) og Memphis Depay (seldur til Olympique Lyonnais).

Þann 29. mars 2017 fór Bastian Schweinsteiger frjálsri för til Chicago Fire í Bandaríkjunum.

Manchester United byrjaði keppnistímabilið á því að vinna Samfélagsskjöldinn með 2:1 sigri á Leicester City. Í ensku úrvalsdeildinni endaði liðið í sjötta sæti, liðið varð enskur deildabikarmeistari eftir 3:2 sigur á Southampton en féll úr leik í ensku bikarkeppninni í undanúrslitum, eftir tap gegn Chelsea. Manchester United vann Ajax í úrslitaleik Evrópukeppninnar og vann því þrjá bikara á keppnistímabilinu. Markahæstur leikmanna á keppnistímabilinu var Zlatan Ibrahimović en hann skoraði 28 mörk í öllum keppnum.

Keppnistímabilið 2017 - 2018

Þær breytingar urðu helstar á leikmannahópi Manchester United, fyrir keppnistímabilið 2017 - 2018, að frá liðinu fóru Andreas Pereira (lánaður til Valencia), Timothy Fosu-Mensah (lánaður til Crystal Palace), Cameron Borthwick-Jackson (lánaður til Leeds), Zlatan Ibrahimović (leystur undan samningi), Adnan Januzaj (seldur til Real Sociedad) og Wayne Rooney (seldur til Everton).

Til liðsins komu Victor Lindelof (keyptur frá Benfica), Romelu Lukaku (keyptur frá Everton) og Nemanja Matić (keyptur frá Chelsea).

Þann 24. ágúst 2017 var samningur Manchester United við Zlatan Ibrahimović endurnýjaður en þann 22. mars 2018 fór Zlatan frá Manchester United til LA Galaxy í Bandaríkjunum.

Þann 22. janúar 2018 urðu leikmannaskipti á milli Manchester United og Arsenal þegar Alexis Sánchez kom til Manchester United og Henrikh Mkhitaryan fór til Arsenal.

Manchester United endaði í öðru sæti ensku úrvalsdeildarinnar á keppnistímabilinu með 81 stig en það var besti árangur liðsins síðan Sir Alex Ferguson stýrði liðinu. Liðið vann hins vegar ekki til neinna verðlauna á keppnistímabilinu, tapaði 1:2 fyrir Real Madrid í leik um ofurbikar Evrópu (UEFA Super Cup), féll úr leik í fimmtu umferð deildabikarkeppninnar eftir tap fyrir Bristol City, tapaði fyrir Sevilla í 16 liða úrslitum meistaradeildar Evrópu og tapaði úrslitaleik ensku bikarkeppninnar fyrir Chelsea. Markahæstur leikmanna á keppnistímabilinu var Romelu Lukaku en hann skoraði 27 mörk í öllum keppnum.

Keppnistímabilið 2018 - 2019

Það urðu ekki miklar breytingar á liði Manchester United fyrir keppnistímabilið 2018 - 2019. Frá liðinu fóru m.a. Michael Carrick (lagði skóna á hilluna), Daley Blind (seldur til Ajax) og Sam Johnstone (seldur til West Bromwich Albion). Þann 1. febrúar 2019 var Marouane Fellaini seldur til Shandong Luneng Taishan í Kína.

Til liðsins komu Frederico Rodrigues de Paula Santos, þekktur sem Fred, (keyptur frá Shakhtar Donetsk), Diogo Dalot (keyptur frá Porto) og Lee Grant (keyptur frá Stoke City).

Þann 18. desember 2018, eftir aðeins sjö sigra í 17 deildarleikjum, var Jose Mourinho vikið úr starfi sem knattspyrnustjóri og daginn eftir var tilkynnt að goðsögn Manchester United, Ole Gunnar Solskjær, myndi stjórna liðinu út keppnistímabilið 2018 - 2019. Þann 20. mars 2019, þegar Mancester United hafði unnið 14 af 19 leikjum undir stjórn Ole Gunnar, var hann ráðinn sem knattspyrnustjóri til næstu þriggja ára. Hin ískalda staðreynd er sú að eftir að fastur samningur var gerður við Ole Gunnar, vann Manchester United einungis tvo af síðustu átta deildarleikjum liðsins.

Í ensku úrvalsdeildinni endaði Manchester United í sjötta sæti og var það í fjórða sinn, síðan 2014, sem liðið var ekki í einu af fjórum efstu sætum úrvalsdeildarinnar. Liðið féll úr leik í þriðju umferð deildabikarkeppninnar og í fjórðungsúrslitum, bæði bikarkeppninnar og meistaradeildar Evrópu. Niðurstaðan varð því sú að Manchester United vann ekki til neinna verðlauna tvö keppnistímabil í röð, í fyrsta sinn í 30 ár. Markahæstur leikmanna á keppnistímabilinu var Paul Pogba en hann skoraði 16 mörk í öllum keppnum.

Keppnistímabilið 2019 - 2020

Helstu breytingar sem urðu á liði Manchester United fyrir keppnistímabilið 2019 - 2020 voru þær að frá liðinu fóru Ander Herrera (leystur undan samningi, fór til Paris Saint-Germain), Antonio Valencia (frjáls för til LDU Quito), Romelu Lukaku (seldur til Inter Milan), Alexis Sánchez (lánaður til Inter Milan), Chris Smalling (lánaður til AS Roma) og Matteo Darmian (seldur til Parma).

Til liðsins komu Daniel James (keyptur frá Swansea City), Aaron Wan-Bissaka (keyptur frá Crystal Palace) og Harry Maguire (keyptur frá Leicester City).

Í janúar 2020 urðu þær breytingar helstar á liði Manchester United að frá liðinu fóru Ashley Young (seldur til Inter Milan) og Marcos Roco (lánaður til Estudiantes). Til liðsins komu Bruno Fernandes (keyptur frá Sporting CP), Nathan Bishop (keyptur frá Southend United) og Odion Ighalo (fenginn að láni frá Shanghai Greenland Shenhua).

Keppnistímabilið 2019 - 2020 var mjög litað af COVID-19 faraldrinum en Manchester United endaði að lokum í þriðja sæti ensku úrvalsdeildarinnar og tapaði ekki leik í síðustu 14 leikjum deildarinnar (níu sigrar og fimm jafntefli). Í öðrum keppnum sem liðið tók þátt í, deildabikarkeppninni, bikarkeppninni og Evrópudeildinni, lauk leik þeirra með tapi í undanúrslitum. Þetta var því þriðja keppnistímabilið í röð sem Manchester United vann ekki til neinna verðlauna en slíkt hafði ekki gerst síðan 1989. Markahæstur leikmanna á keppnistímabilinu var Anthony Martial en hann skoraði 23 mörk í öllum keppnum.

Keppnistímabilið 2020 - 2021

Mánudagskvöldið 5. október 2020, þegar lokað var fyrir félagaskipti í enska fótboltanum, höfðu þær breytingar helstar orðið á liði Manchester United, frá janúar 2020, að frá liðinu voru farnir þeir Diogo Dalot (lánaður til AC Milan), Alexis Sánchez (seldur til Inter Milan), Chris Smalling (seldur til AS Roma), Joel Pereira (lánaður til Huddersfield) og Tahith Chong (lánaður til Werder Bremen).

Til liðsins, fyrir upphaf keppnistímabilsins, komu til liðsins þeir Donny van de Beek (keyptur frá Ajax), Alex Telles (keyptur frá Porto), Amad Diallo (keyptur frá Atalanta), Edinson Cavani (samningslaus eftir að hafa verið hjá Paris Saint-Germain) og Facundo Pellistri (keyptur frá Club Atlético Peñarol). Þann 7. janúar 2012 var Amad Diallo keyptur frá Atalanta.

Á keppnistímabilinu fóru nokkrir leikmenn frá liði Manchester United og ber helst að nefna þá Timothy Fosu-Mensah (seldur til Bayer Leverkusen), Marcos Rojo (seldur til Boca Juniors), Jesse Lingard (lánaður til West Ham United) og Facundo Pellistri (lánaður til Deportivo Alavés).

Í ensku úrvalsdeildinni endaði Manchester United í öðru sæti en það var að gerast í annað sinn frá því að Sir Alex Ferguson lét af störfum. Af öðru markverðu í deildarkeppninni má nefna að Manchester United vann Southampton 9:0 og tapaði fyrir Tottenham Hotspur á Old Trafford, 1:6. Það tap er jafnt versta tapi Manchester United í úrvalsdeildinni en liðið tapaði með sama markamun fyrir Manchester City árið 2011. Þá ber þess að geta að Manchester United tapaði engum útileik á keppnistímabilinu og varð með því fjórða liðið til að ná þeim árangri í efstu deild enska fótboltans.

Manchester United tapaði fyrir Manchester City í undanúrslitum deildabikarkeppninnar, fyrir Leicester City í fjórðungsúrslitum bikarkeppninnar auk þess sem liðið féll úr leik í riðlakeppni Meistaradeildar Evrópu og fór því í Evrópudeildina. Þar tapaði liðið fyrir Villarreal í ótrúlegri vítaspyrnukeppni, 10:11, þar sem David de Gea reyndist vera skúrkurinn í liði Manchester United. Tapið gegn Villarreal þýddi að Manchester United vann ekki til neinna verðlauna, fjórða keppnistímabilið í röð. Slíkt hafði ekki gerst frá því að liðið féll úr efstu deild enska fótboltans, eftir keppnistímabilið 1973 - 1974. Markahæstur leikmanna á keppnistímabilinu var Bruno Fernandes en hann skoraði 28 mörk í öllum keppnum.

Keppnistímabilið 2021 - 2022

Þegar lokað var fyrir félagaskipti leikmanna, að kvöldi 31. ágúst 2021, höfðu nokkrar breytingar orðið á liði Manchester United frá lokum keppnistímabilsins 2020 - 2021. Frá liðinu voru m.a. farnir Sergio Germán Romero (leystur undan samningi), Facundo Pellistri (lánaður til Alavés), Andreas Pereira (lánaður til Flamengoo), Tahith Chong (lánaður til Birmingham City), Axel Tuanzebe (lánaður til Aston Villa), Brandon Williams (lánaður til Norwich City) og Daniel James (seldur til Wolverhampton Wanderers).

Til liðsins komu Jesse Lindgaard (var í láni hjá West Ham United), Diogo Dalot (var í láni hjá AC Milan), Tom Heaton (frjáls för frá Aston Villa), Jadon Sancho (keyptur frá Borussia Dortmund), Raphaël Varane (keyptur frá Real Madrid) og - síðast en ekki síst - Cristiano Ronaldo (keyptur frá Juventus).

Í janúar 2022 fóru nokkrir leikmenn frá Manchester United, m.a. þeir Anthony Martial (lánaður til Sevilla), Amad Diallo (lánaður til Rangers) og Donny van de Beek (lánaður til Everton).

Þann 21. nóvember 2021 lét Ole Gunnar Solskjær af störfum sem knattspyrnustjóri Manchester United, eftir afleitt gengi liðsins í nokkurn tíma. Liðið hafði þá m.a. tapað 0:5 fyrir Liverpool, 0:2 fyrir Manchester City og 1:4 fyrir Watford, fengið á sig 15 mörk í síðustu fimm leikjum í úrvalsdeildinni og aðeins unnið einn af sjö síðustu deildarleikjum. Við brotthvarf Ole Gunnar tók Michael Carrick tímabundið við knattspyrnustjórn Manchester United en þann 5. desember 2021 var Ralf Rangnick ráðinn knattspyrnustjóri liðsins, í það minnsta til loka yfirstandandi keppnistímabils. Ralf Rangnick hvarf á braut eftir keppnistímabilið 2021 - 2022 og Erik ten Hag, sem hafði stýrt liði Ajax með góðum árangri, var ráðinn knattspyrnustjóri Manchester United þann 21. apríl 2022.

Keppnistímabilið 2021 - 2022 lenti Manchester United í sjötta sæti ensku úrvalsdeildarinnar með aðeins 58 stig, sem er lægsti stigafjöldi liðsins í sögu úrvalsdeildarinnar. Liðið féll úr leik í þriðju umferð deildabikarkeppninnar, í fjórðu umferð bikarkeppninnar og í 16 liða úrslitum meistaradeildar Evrópu. Þetta varð því fimmta keppnistímabilið í röð sem Manchester United vann ekki til neinna verðlauna, sem er lengsta þurrð verðlauna síðan sex keppnistímabila þurrðin frá 1968 - 1969 til 1973 - 1974. Markahæstur leikmanna á keppnistímabilinu var Cristiano Ronaldo en hann skoraði 24 mörk í öllum keppnum.

Keppnistímabilið 2022 - 2023

Talsverðar breytingar urðu á liði Manchester United fyrir keppnistímabilið 2022 - 2023. Margir leikmenn fóru frá liðinu og ber helst að nefna þá Paul Pogba (frjáls för til Juventus), Nemanja Matic (frjáls för til Roma), Jesse Lingard (frjáls för til Nottingham Forest), Juan Mata (samningslaus), Edinson Cavani (samningslaus, fór til Valencia), Andreas Pereira (seldur til Nottingham Forest), Dean Henderson (lánaður til Fulham), Eric Bailly (lánaður til Marseille) og Alex Telles (lánaður til Sevilla).

Þeir leikmenn sem komu til baka til Manchester United, eftir að hafa verið í láni, voru þeir Anthony Martial (var hjá Sevilla), Donny van de Beek (var hjá Everton) og Brandon Williams (var hjá Norwich City). Til liðsins komu einnig þeir Christian Eriksen (samningslaus eftir að hafa verið hjá Brentford), Tyrell Malacia (keyptur frá Feyenoord), Lisandro Martínez (keyptur frá Ajax), Carlos Henrique Casimiro, þekktur sem Casemiro (keyptur frá Real Madrid), Antony Matheus dos Santos, þekktur sem Antony (keyptur frá Ajax) og Martin Dubravka (fenginn að láni frá Newcastle United). Í byrjun árs 2023 komu tveir leikmenn að láni til Manchester United, Wout Weghorst (kom frá Burnley) og Marcel Sabitzer (kom frá Bayern Munich).

Þá er rétt að geta þess að þann 22. nóvember 2022 var samningi Manchester United við Cristiano Ronaldo rift og hann fór, í ársbyrjun 2023, til Al Nassr í Sádi-Arabíu.

Á keppnistímabilinu 2022 - 2023 endaði Manchester United í þriðja sæti úrvalsdeildarinnar og af deildarleikjum tímabilsins ber án efa hæst tap Manchester United fyrir Liverpool á Anfield þann 5. mars en leikurinn tapaðist 0:7. Manchester United hafði aðeins einu sinni áður tapað svona illa en það var fyrir Wolverhampton Wanderers árið 1931. Liðið vann deildabikarkeppnina en tapaði fyrir Manchester City í úrslitaleik bikarkeppninnar. Í Evrópudeildinni féll Manchester United úr leik í 16 liða úrslitum, eftir tap gegn Sevilla. Liðið vann einn bikar á tímabilinu en hafði ekki unnið til verðlauna síðan liðið vann Evrópudeildina 2017. Markahæstur leikmanna á keppnistímabilinu var Marcus Rashford en hann skoraði 30 mörk í öllum keppnum.

Keppnistímabilið 2023 - 2024

Þegar lokað var fyrir félagaskipti leikmanna, að kvöldi 1. september 2023, höfðu nokkrar breytingar orðið á liði Manchester United frá lokum keppnistímabilsins 2022 - 2023. Frá liðinu voru m.a. farnir David De Gea (samningslaus), Anthony Elanga (seldur til Nottingham Forest), Dean Henderson (seldur til Crystal Palace), Frederico Rodrigues de Paula Santos, þekktur sem Fred, (seldur til Fenerbahçe), Phil Jones (samningslaus), Alex Telles (seldur til Al-Nassr), Alex Tuanzebe (samningslaus), Brandon Williams (lánaður til Ipswich Town), Eric Bailly (seldur til Beşiktaş) og Mason Greenwood (lánaður til Getafe). Þessu til viðbótar má geta þess að í janúar 2024 fóru frá liðinu þeir Donny van de Beek (lánaður til Eintracht Frankfurt) og Jadon Sancho (lánaður til Borussia Dortmund) Sá síðarnefndi fór frá Manchester United, eftir að hafa verið settur út í kuldann af Erik ten Hag.

Til liðsins komu m.a. þeir Jonny Evans (samningslaus eftir að hafa verið hjá Leicester City), Rasmus Højlund (keyptur frá Atalanta), Mason Mount (keyptur frá Chelsea), Andre Onana (keyptur frá Inter Milan), Altay Bayindir (keyptur frá Fenerbahçe), Sergio Reguilon (fenginn að láni frá Tottenham Hotspur) og Sofyan Amrabat (fenginn að láni frá Fiorentina).

Manchester United endaði í áttunda sæti úrvalsdeildarinnar með markatöluna 57:58 en það er versti árangur liðsins frá keppnistímabilinu 1989 - 1990. Liðið féll úr umferð í fjórðu umferð deildabikarkeppninnar og féll úr leik í riðlakeppni meistaradeildar Evrópu með einungis fjögur stig. Það er versti árangur Manchester United í sögu meistaradeildarinnar. Árangur Manchester United, keppnistímabilið 2023 - 2024, var því alls ekki góður en ljósið í myrkrinu var að liðið varð bikarmeistari, eftir óvæntan 2:1 sigur á Manchester City. Sá sigur var í raun ástæða þess að Erik ten Hag hélt starfi sínu sem knattspyrnustjóri liðsins. Markahæstur leikmanna á keppnistímabilinu var Rasmus Højlund en hann skoraði 16 mörk í öllum keppnum.

Keppnistímabilið 2024 - 2025

Óhætt er að segja að nokkurrar bjartsýni hafi gætt í byrjun keppnistímabilsins 2024 - 2025 um að betri tíð væri í vændum, m.a. vegna þess að þann 24. febrúar 2024 var formlega gengið frá kaupum Íslandsvinarins og auðkýfingsins Sir Jim Ratcliffe á 25% hlut í Manchester United. Þótt ýmsar blikur væru samt sem áður á lofti, grunaði þó engan að framundan væri eitt versta tímabil í sögu félagsins.

Af leikmannamálum keppnistímabilsins 2024 - 2025 er helst frá því að segja að þegar lokað var fyrir félagaskipti leikmanna, í byrjun tímabilsins, voru komnir til liðsins þeir Joshua Zirkzee (keyptur frá Bologna), Leny Yoro (keyptur frá Lille), Matthijs de Ligt og Noussair Mazraoui (keyptir frá Bayern Munich) og Manuel Ugarte (keyptur frá Paris Saint-Germain). Samanlagt kaupverð þessara leikmanna var tæplega 200 milljónir punda.

Í febrúar 2025 komu til félagsins þeir Ayden Heaven (keyptur frá Arsenal) og Patrick Dorgu (keyptur frá Lecce).

Af þeim fjölmörgu leikmönnum sem fóru frá félaginu, ber helst að nefna þá Álvaro Carreras (seldur til Benfica), Raphaël Varane (frjáls för), Shola Shoretire (frjáls för), Anthony Martial (frjáls för), Donny van de Beek (seldur til Girona), Mason Greenwood (seldur til Marseille), Aaron Wan-Bissaka (seldur til West Ham United), Facundo Pellistri (seldur til Panathinaikos) og Scott McTominay (seldur til Napoli).

Það var eftirtektarvert á tímabilinu að leikmenn, sem ekki voru í náðinni hjá knattspyrnustjóranum, voru lánaðir frá félaginu. Jadon Sancho kom í stutta stund til Manchester United, eftir að hafa verið í láni hjá Borussia Dortmund, en var þann 31. ágúst 2024 lánaður til Chelsea til loka keppnistímabilsins. Þann 25. janúar var Antony lánaður til Real Betis til loka keppnistímabilsins en þess ber að geta að Manchester United keypti hann frá Ajax, í ágúst 2022, fyrir 82 milljónir punda. Þann 2. febrúar 2025 var Marcus Rashford lánaður út tímabilið til Aston Villa en hann hafði þá ekki verið valinn í lið Manchester United síðan 12. desember 2024. Tveimur dögum seinna, þann 4. febrúar 2025, var Tyrell Malacia lánaður til PSV Eindhoven til loka tímabilsins. Allir þessir leikmenn komu til baka til Manchester United, við lok keppnistímabilsins 2024 - 2025.

Keppnistímabilið byrjaði vægast sagt illa hjá Manchester United og í byrjun október fóru að heyrast efasemdaraddir um að Erik ten Hag væri rétti maðurinn til að stýra liðinu til árangurs. Liðið var þá í 14. sæti í ensku úrvalsdeildinni með átta stig eftir fyrstu sjö leiki tímabilsins en það er versta byrjun liðsins síðan keppnistímabilið 1989 - 1990. Þann 28. október var Erik ten Hag leystur frá störfum og við starfi hans tók fyrrum framherji Manchester United, Ruud van Nistelrooy. Þann 11. nóvember 2024 var Rúben Amorim ráðinn knattspyrnustjóri Manchester United en hann hafði náð góðum árangri með Sporting í Portúgal.

Þrátt fyrir talsverðar væntingar, með ráðningu Rúben Amorim, er ljóst að keppnistímabilið 2024 - 2025 er eitt það allra versta í sögu liðsins hin síðari ár. Liðið byrjaði keppnistímabilið á því að tapa fyrir Manchester City í leik um Samfélagsskjöldinn, reyndar í vítaspyrnukeppni. Í ensku úrvalsdeildinni hafnaði Manchester United í 15. sæti með 42 stig og markatöluna 44:54. Liðið hafði ekki endað svo neðarlega síðan keppnistímabilið 1989 - 1990 og 42 stig er lægsta stigaskor síðan keppnistímabilið 1973 - 1974. Fulham sló liðið út úr ensku bikarkeppninni og Tottenham Hotspur sló liðið út úr deildabikarkeppninni. Í Evrópudeildinni lék liðið til úrslita gegn Tottenham Hotspur en tapaði úrslitaleiknum 0:1. Manchester United vann því ekki til neinna verðlauna, sem síðast gerðist keppnistímabilið 2021 - 2022 og þar að auki tryggði liðið sér ekki þátttökurétt í neinni Evrópukeppni en slíkt hafði ekki gerst síðan keppnistímabilið 2013 - 2014. Markahæstur leikmanna á keppnistímabilinu var Bruno Fernandes en hann skoraði 19 mörk í öllum keppnum.

Það var ekki eingöngu á knattspyrnuvellinum sem Manchester United gekk illa keppnistímabilið 2024 - 2025, liðið var einnig í fjárhagsvandræðum og sömuleiðis var greinileg óeining innan liðsins. Þannig að heilt yfir má segja að þetta keppnistímabil hafi verið hrein hörmung!

Keppnistímabilið 2025 - 2026

Eftir keppnistímabilið 2024 - 2025 voru nokkrir leikmenn sem fóru frjálsri för frá Manchester United og helst ber að nefna þá Christian Eriksen (fór til Wolfsburg) og Victor Lindelöf (fór til Aston Villa). Þá hætti Jonny Evans knattspyrnuiðkun og eftir brotthvarf hans er, í liði Manchester United, enginn sem unnið hefur ensku úrvalsdeildina frá því að hún var stofnuð. Sömuleiðis er enginn lengur í liðinu sem hefur verið undir stjórn Sir Alex Ferguson en það gerðist síðast árið 1974.

Það sem sömuleiðis gerðist, eftir að keppnistímabilinu 2024 - 2025 lauk, var að til liðsins komu til baka fjórir leikmenn sem höfðu verið á láni á síðasta keppnistímabili. Þetta eru þeir Jadon Sancho, Antony, Marcus Rashford og Tyrell Malacia. Eftir komu þeirra var ljóst að Rúben Amorim myndi ekki nota þá í aðalliði Manchester United. Í maí kom í ljós að það sama átti við Alejandro Garnacho og allir þessir fimm leikmenn voru settir á sölulista. Þess má geta að heildarlaun þessara leikmanna eru um ein milljón punda á viku og þau laun þarf Manchester United að borga, svo lengi sem leikmennirnir eru samningsbundnir félaginu.

Þann 23. júlí 2025 var Marcus Rashford lánaður til Barcelona til loka keppnistímabilsins 2025 - 2026. Í lánssamningnum felst að Barcelona greiðir laun hans og getur, að loknum lánstímanum, keypt hann á 30,3 milljónir punda.

Þess var beðið með nokkurri eftirvæntingu hvaða leikmenn Manchester United myndi kaupa til liðsins fyrir upphaf keppnistímabilsins 2025 - 2026. Fyrstu kaupin voru gerð þann 12. júní en þá kom til liðsins Matheus Cunha (keyptur frá Wolverhampton Wanderers) og þann 5. júlí voru næstu kaup gerð, þegar hinn 18 ára gamli Diego León (keyptur frá Cerro Porteño í Paraguay) kom til liðsins. Þann 21. júlí kom síðan Bryan Mbeumo (keyptur frá Brentford) til liðsins, þann 9. ágúst var Benjamin Šeško keyptur frá RB Leipzig og þann 1. september var markmaðurinn Senne Lammens keyptur frá Royal Antwerp.

Þann 1. september 2025, áður en lokað var fyrir félagaskipti á Englandi, urðu þær breytingar á leikmannahópi Manchester United að frá liðinu fóru þeir Alejandro Garnacho (seldur til Chelsea), Antony (seldur til Real Betis), Rasmus Højlund (lánaður til Napoli), Jadon Sancho (lánaður til Aston Villa) og Harry Amass (lánaður til Sheffield Wednesday).

Þann 11. september 2025 var Andre Onana lánaður til Trabzonspor Kulübü í Tyrklandi, til loka keppnistímabilsins.

Frá þessari síðu er hægt að fara á tvær undirsíður. Á annarri síðunni er hægt að fylgjast sérstaklega með úrslitum leikja liðsins og á hinni síðunni er að finna nokkrar myndir.

Hér er hægt að sjá hvernig liðinu vegnaði keppnistímabilin 2002 - 2003, 2003 - 2004, 2004 - 2005, 2005 - 2006, 2006 - 2007, 2007 - 2008, 2008 - 2009, 2009 - 2010, 2010 - 2011, 2011 - 2012, 2012 - 2013, 2013 - 2014, 2014 - 2015, 2015 - 2016, 2016 - 2017, 2017 - 2018, 2018 - 2019, 2019 - 2020, 2020 - 2021, 2021 -2022, 2022 - 2023, 2023 - 2024 og 2024-2025.